| pona! tenpo sike suno li sin! |
|
|
tenpo suno 1
lon tenpo nun 1
lon tenpo sike 08
(Tue) 20:41 |
| |
tenpo ni li tenpo suno pi nanpa 1 lon tenpo nun pi nanpa 1 lon tenpo sike suno pi nanpa 2008 lon ma ali!
tenpo kama lili la tenpo suno li kama ante lon ma Nusilan. tenpo ni li 23:50 lon ma Nusilan li 20:50 lon ma Nijon. tenpo kama lili la mi tawa tomo telo. |
|
| |
|
o sitelen e toki |
| |
| nimi sin tu |
|
|
tenpo suno 4
lon tenpo nun 12
lon tenpo sike 07
(Tue) 17:39 |
| |
tenpo pini pi sike suno wan la mi kama sona e toki pona. mi musi mute. toki pona li jo e nimi lili li ken toki e ijo mute. tenpo kama lili la toki pona li ante lili. toki pona li kama jo e lipu pi kama sona. lipu ni li jo e ijo ali lon toki pona. mi kepeken e lipu ni la mi ken pona e pakala lon sitelen mi.
lipu ni li jo e nimi sin tu. ni li nimi "pan" en nimi "esun".
jan Sonja li toki e ni: nimi sin ni tu li "bonus words". mi pilin e ni: nimi "pan" li sama "ko seli pi kili lili kiwen". nimi "esun" li sama "tomo pi kama jo kepeken mani". nimi sin ni li ken lili e kulupu nimi ni. nimi sin ni li kama la mi ken toki sama ni: "pan lipu sike poka kiwen pi telo mama" "tomo suli pi esun lili mute". mi ken toki kin sama ni: "pan Pizza" "esun Prada". nimi sin ni li nimi pona!
mi wile kama jo e lipu pi kama sona. taso ijo ike suli li lon mi. mi ken ala lukin e toki Inli pona! mi wile e lipu ni lon toki Nijon. jan seme li kama e ni? a... |
|
| |
|
o sitelen e toki |
| |
| 8:15 6/8/2007 |
|
|
tenpo suno 6
lon tenpo nun 8
lon tenpo sike 07
(Mon) 8:15 |
| |
mood:  sad
|
tenpo ni li 8:15 lon tenpo suno pi nanpa 6 lon tenpo nun pi nanpa 8. tenpo sike suno pini pi nanpa 62 la, ilo utala pi pakala suli li kama.
tenpo ni la ilo utala pi pakala suli li lon ma mute. tenpo pini lili la ma Mewika li pilin e ni: ma Ilakija li kama jo e ilo utala pi pakala suli. tan ni la ma Mewika li utala e ma Ilakija. taso ma Mewika li jo e ilo utala pi pakala suli mute pi nanpa wan lon ma ali. tenpo ni la ma Anku lete li toki e ni: ona li kama jo e ilo utala pi pakala suli.
mi sona ala e ni: jan lawa mute li sona ala sona e ni: ilo utala pi pakala suli li pali la, jan li kama seme? tenpo ni kin la, ijo tan ilo utala pi pakala suli lon tenpo sike suno pi nanpa 62 li awen lon sijelo jan li pana e seli ike tawa sijelo jan ona. jan lawa li kama jo e ilo utala pi pakala suli tan seme? jan li moli mute li kama jo e pakala mute lon tenpo suli sama ni la, tan pi kama jo li lukin lili.
mi pilin e ni: tan pi kama jo li ken tawa kepeken nasin ante. ilo utala pi pakala suli li kama weka tan ma ali la pona. |
|
| |
|
o sitelen e toki |
| |
| toki Inli |
|
|
tenpo suno 4
lon tenpo nun 8
lon tenpo sike 07
(Sat) 20:30 |
| |
mood:  relaxed
|
mi kama sona e toki pona lon tenpo pini la, mi pilin ala e ni: mi wile kama sona e toki Inli. lipu Lasuna li jo e lipu lawa lon toki Nijon. mi ken ante e toki Inli tawa toki Nijon kepeken ilo toki lon lipu Kuku (Google). mi kama lon kulupu pi toki pona lon lipu Jaku kepeken ilo toki ni.
taso kulupu ni li ante e mi. tenpo mute la mi ante e toki Inli tawa toki Nijon.tan ni la mi kama jo lili e pilin pi toki Inli. tenpo ni la mi ken lukin e toki Inli kepeken lipu nimi pi toki Inli.
tenpo pini lili la toki pi jan Sonja lon "kalama sama ma Kanata" li lon lipu pi toki pona. mi kama jo e ijo Mp3 li kute e ni mute mute mute... tenpo ni la mi kama jo e nimi pi toki Inli lon ni ali! kute pi toki Inli li ike pali. taso mi kama jo ali la, mi pilin pona mute.
tomo mi li lon ma tomo Tota poka ma tomo Tokijo. tenpo ni la pali pi suno lili li lon linja telo Alakawa (Arakawa river). linja telo ni li lon insa pi ma tomo Tota en ma tomo Tokijo. pali pi suno lili lon toki Nijon li "Hanabi". lipu nimi pi toki Inli li toki e ni: pali pi suno lili lon toki Inli li "Fireworks". pali pi suno lili lon ma ante pi ma Nijon li sama ala sama? |
|
| |
|
o sitelen e toki |
| |
| ike mute a... |
|
|
tenpo suno 26
lon tenpo nun 7
lon tenpo sike 07
(Thu) 13:13 |
| |
mood: disappointed
|
utala musi suli pi sike noka lon ma Asija li kama "wan lon tu tawa pini". tenpo pimeja pini la utala musi ni tu li lon.
ma Ilakija en ma Anku seli li pali pona. ona tu li pali lon tenpo ali li pali e pana sike noka pi pini pakala mute (Penalty kick Shootout) . tenpo pini ni la ma Ilakija li 5, ma Anku seli li 3. tan ni la ma Ilakija li sewi tawa utala musi pini.
tenpo pini ni la ma Nijon en ma Alapijasajusija (Al-Mamlaka al-ʻArabiyya as-Saʻūdiyya / Kingdom of Saudi Arabia) li pali. ma sewi ni en ma Ilakija li wile pali e utala musi pini. tenpo sike suno pini pi nanpa luka luka tu tu la ma Ilakija li lon sinpin pi ma Nijon li weka e nasin tawa utala musi suli pi sike noka lon ma ali (FIFA World Cup) lon ma Mewika. mi kama jo pilin lon tenpo pi pali ni la mi ken ala awen e oko mi tan telo kama... ma Nijon li sewi la mi ken lukin e utala musi pi ma Nijon en ma Ilakija lon utala musi pini! mi pana wawa tawa ma Nijon mute.
taso... ma Alapijasajusija li wawa mute.
ma Alapijasajusija li 3, ma Nijon li 2. ni li ali. mi pilin e ni: ma Nijon li pali pona. taso jan pi ma Alapijasajusija li suli mute. ma Nijon li ken ala lawa e utala musi ni. tan ni la ma Nijon li anpa.
ma Nijon en ma Anku seli li wile pali e utala musi sewi pi nanpa tu wan. tenpo pini ni la ma Ilakija en ma Alapijasajusija li pali e utala musi pini. mi pilin e ni: ma Nijon li wile kama sewi pi nanpa tu wan la pona. |
|
| |
|
toki 1 li lon
o sitelen e toki |
| |
| ma Nijon li 1, ma Oselija li 1. |
|
|
tenpo suno 22
lon tenpo nun 7
lon tenpo sike 07
(Sun) 8:00 |
| |
mood: excited
|
tenpo pimeja pini lon ma Wije la ma Nijon en ma Oselija li pali e utala musi pi "wan lon tu tu tawa pini" lon utala musi suli pi sike noka lon ma Asija.
tenpo ali lon utala musi ni la ma tu li pali pona. tenpo pini ni la ma Nijon li 1, ma Oselija li 1. tan ni la ma tu li pali e pana sike noka pi pini pakala mute (Penalty kick Shootout) . tenpo pini ni la ma Nijon li 4, ma Oselija li 3. tan ni la ma Nijon li sewi.
ma Oselija li wawa. tenpo sike suno pini la ma tu ni li pali lon utala musi suli pi sike noka lon ma ali (FIFA World Cup) lon ma Tosi. tenpo pini ni la ma Oselija li 3, ma Nijon li 1. jan Nijon mute li sona e ni li pana wawa tawa ma Nijon. tenpo ni la ma Nijon li sewi. ni li pona mute tawa ona.
tenpo pimeja kama la ma Alapijasajusija (Al-Mamlaka al-ʻArabiyya as-Saʻūdiyya / Kingdom of Saudi Arabia) en ma Opekiton (O‘zbekiston Respublikasi / Republic of Uzbekistan) li pali e utala musi lon ma tomo Sakata lon ma Intonesija. (ma Alapijasajusija en ma Opekiton li lon lipu pi tokipona.org ala. nimi ni tu li ken pakala.) ma sewi ni en ma Nijon li pali e utala musi pi "wan lon tu tawa pini" (Semi Final) lon ma Wije. |
|
| |
|
toki 1 li lon
o sitelen e toki |
| |
| utala musi suli pi sike noka lon ma suli Asija |
|
|
tenpo suno 17
lon tenpo nun 7
lon tenpo sike 07
(Tue) 9:02 |
| |
mood: happy
|
tenpo ni la utala musi suli pi sike noka lon ma suli Asija li lon ma tu tu. ma tu tu ni li ma Tawi, ma Wije, ma Malasija, en ma Intonesija. ma 12 tan ma 24 li sewi li tawa utala musi suli ni. ma sewi 12 en ma lon 4 li tu tawa kulupu 4. ma Nijon li lon kulupu B.
tenpo pimeja pini la utala musi pi kulupu B li pini ali. ma Nijon li sewi e kulupu ni!
kulupu B li kulupu pi ike pali. ma 2 lon ma Alapi li wawa. ma Wije li wawa ala. taso ma Wije li ma lon pi kulupu ni. jan Wije mute li kama li pana wawa tawa ma ona.
ali li pini la ma Nijon li kama sewi. taso ike li lon mute. mi pilin e ni: mi wile lukin e ilo pi sitelen tawa li pana wawa tawa ma Nijon lon utala musi kama.
kulupu B
ma Imala (Al-Imārāt al-ʿArabiyyah al-Muttaḥidah)
ma Kata (Dawlat Qatar)
ma Nijon
ma Wije
* ma Imala en ma Kata li lon lipu pi tokipona.org ala. nimi ni tu li ken pakala.
ma Imala lon toki Inli li UAE. ma Kata lon toki Inli li Qatar.
ma Wije 2, ma Imala 0.
ma Nijon 1, ma Kata 1.
ma Kata 1, ma Wije 1.
ma Nijon 3, ma Imala 1.
ma Nijon 4, ma Wije 1.
ma Imala 2, ma Kata 1.
+7 ma Nijon
+4 ma Wije
+3 ma Imala
+2 ma Kata
ma Nijon en ma Wije li sewi. ma Imala en ma Kata li anpa.
ma Nijon en ma Oselija li pali e utala musi pi "wan lon tu tu tawa pini" (Quater final) .
ma Wije en ma Ilakija li pali ni kin.
(ma Ilakija en ma Oselija li ma sewi pi kulupu A.) |
|
| |
|
o sitelen e toki |
| |
| jan pona mi li kama e kalama musi sin. |
|
|
tenpo suno 23
lon tenpo nun 6
lon tenpo sike 07
(Sat) 23:55 |
| |
mood: happy
|
jan pi kalama musi mute li lon ma Nijon. taso lili li lon kulupu pi lipu sike kalama. jan li pali mute li kama suli e nimi ona la ona li ken kama lon kulupu pi lipu sike kalama. tan ni la jan mute li pali e ijo mute. jan li pana e kalama musi ona lon nasin. jan li kama lon utala pi kalama musi. ...
jan akB li jan sama ni. tenpo sike suno pi nanpa tu la mi kama sona e ona. ona li lon nasin li pana e kalama musi kepeken ilo kalama pi linja luka wan. kalama musi ona li pona mute tawa mi. tan ni la mi kama jo e lipu sike kalama li kute e kalama musi ni. mi tawa tomo pi kalama musi li kute e pali ona.
tenpo kama lili la ona li pana e lipu sike pi kalama musi sin. ona li lon kulupu pi lipu sike ala. tan ni la ona li kama e lipu sike kepeken kulupu lili pi lipu sike li pana e lipu sike ni. sina ken kute e kalama musi ni lon lipu ni:
http://myspace.com/akbwebmusic
kalama musi sin ni kin li pona mute. mi wile kama jo e ni. |
|
| |
|
o sitelen e toki |
| |
| lipu Wikipesija |
|
|
tenpo suno 16
lon tenpo nun 6
lon tenpo sike 07
(Sat) 23:04 |
| |
tenpo pini mute la lipu Wikipesija lon toki pona li weka li tawa lipu Wikija. tenpo pini lili la nimi Toki Pona lon lipu Wikipesija lon toki Inli li weka. tan ni la jan mute lon kulupu toki Jaku li pilin ike mute.
mi pilin ante lili e ni. mi lukin e lipu Wikipesija lon tenpo pini la mi lukin e sitelen toki ni: "ijo lili li weka la kalama pi toki pona li sama kalama pi toki Nijon. ..." sama? mi pilin ante mute!! tan ni la mi lukin e tan pi sitelen ni lon lipu mute pi toki pona. taso mi ken ala lukin e ni: seme li tan pi sitelen ni.
mi ken ala lukin pona e toki Inli. tan ni la mi sona ala e ni: nimi Toki Pona lon lipu Wikipesija lon toki Inli li weka tan seme? taso mi pilin e ni: ijo sama mi li lon jan ante pi toki pona anu seme? jan ni li wile pilin seli li weka e nimi ni. ni li ike. taso mi ken sona e pilin pi jan ni tan ijo kama tawa mi.
mi pilin e ni: lipu pi jan Sonja li kama la ali li kama pona. tenpo kama ni la mi mute li ken kama jo e tan pi ijo mute lon toki pona. taso mi pilin kin e ni: mi mute kin li ken pali pona tawa toki pona. mi mute li sitelen mute lon toki pona la sitelen ni li kama tan pi ijo ni: toki pona li lon li pali wawa. |
|
| |
|
o sitelen e toki |
| |
| jan sona |
|
|
tenpo suno 10
lon tenpo nun 6
lon tenpo sike 07
(Sun) 10:14 |
| |
mood: happy
|
sina sona ala sona e jan Sona? ona li jan Anku li tawa ma Nijon li toki e kalama musi lon toki Nijon. kalama musi ona li pona tawa jan mute. sina ken sona e ona lon lipu ni:
lipu pi jan Sona http://www.sonamusic.net/
musi toki li pini. mi wile toki e jan "Sona" ala e jan "sona".
tenpo ni la ante suli li kama lon toki pona. jan Sonja li mama pi toki pona li sitelen e lipu suli. lipu ni li wile jo e sona pi toki pona ali li jo e sitelen toki mute. sitelen toki ni li wile weka e pimeja pi nasin toki lon toki pona. lipu ni li wile jo kin e sitelen musi sin mute e pali musi e ijo musi pi nasin jan. lipu ni li sama "lipu sewi" li wile lipu lon sewi pi ijo ali poka toki pona. lipu ni li wile kama lon tenpo sike suno kama pi nanpa wan anu tu.
tan ni la jan Sonja li kama e kulupu toki sin lon lipu Jaku. ni li kulupu toki Jaku pi "jan sona".
jan Sonja li lukin e sitelen jan li pana e nimi "jan sona" tawa jan ni la jan ni li ken kama lon kulupu ni li ken pona e toki pona lon kulupu ni. tan ni la "jan sona" li nimi pona mute tawa jan ali pi toki pona. mi kin kama lon kulupu ni! tenpo ni la jan sona luka tu wan li lon. mi pilin musi e ni: seme li kama lon kulupu ni? jan Sonja taso li sona e ni. |
|
| |
|
o sitelen e toki |
| |
| toki pona li pona ala pona pali? |
|
|
tenpo suno 29
lon tenpo nun 5
lon tenpo sike 07
(Tue) 8:23 |
| |
mood: pessimistic
|
toki pona li jo e nimi ali 118. taso jan mute li toki e ni: toki pona li ike pali. jan wan lon kulupu toki pi lipu Jaku (http://groups.yahoo.com/group/tokipona/) li toki e ni: nimi pi "internationally known" li lon li ken kepeken kin lon toki pona anu seme? ...mi pilin ike mute.
tenpo pini la toki Epelanto li kama lon li jo e nimi ali 900 taso. taso jan mute lon Elopa li kama e nimi sin mute lon toki Epelanto. tenpo ni la toki Epelanto li jo e nimi mute mute mute! tenpo ni la toki Epelanto li toki pi jan Elopa taso. mi mute ken ala kama sona e nimi ali lon toki Epelanto.
mi pilin e ni: toki pona li kama sama ni la ike mute.
mi wile toki e ni: jan mute o kama sona e toki pona kepeken tenpo nun luka tu wan. jan lili lon ma Nijon li kama sona e nimi 507 lon toki Inli kepeken tenpo sike tu wan. tan ni la mi pilin e ni: mi mute li wile kepeken e tenpo nun luka tu wan la mi mute li ken kama sona e nimi ali 118. tenpo pini ni la mi mute li ken toki e ijo mute li wile ala e nimi sin. mi pilin e ni: tenpo nun luka tu wan li tenpo lili. mi wile kepeken e tenpo sike luka tawa toki "Basic English" poka nimi ali 850. toki "Basic English" li pona pali lili, toki pona li pona pali mute. |
|
| |
|
o sitelen e toki |
| |
| poki pi kili jelo palisa |
|
|
tenpo suno 23
lon tenpo nun 2
lon tenpo sike 07
(Fri) 18:25 |
| |
mood: happy
|
ni li poki pi kili jelo palisa. kili jelo palisa li kiwen ala li ken kama open selo tan pakala lili li pana e insa tawa poka li kama jaki e ijo poka ni. poki ni li kiwen li weka tan palaka sama ni. ni li pona mute tawa mi.
mi tawa ma tomo Tokijo li tawa tomo suli pi kama jo ijo pi nimi "Tokyu Hands" li kama jo e poki ni. jan pana poki ni li toki e ni: kili jelo palisa lon ma ali luka tu tu tan luka luka li ken kama lon insa poki ni. poki ni li kama tawa ma Nijon tan ma Kanata.
sina wile kin kama jo e poki ni la o lukin e lipu ni. http://www.bananaguard.com sina ken kama jo e poki ni wan kepeken mani Mewika luka tu.
mi kama jo e poki ni wan kepeken mani Nijon 950. ni li sama mani Mewika luka tu wan. tan ni la poki ni li kama nasin ali tan ma Kanata tawa ma Nijon kepeken mani Mewika wan taso!! ni li musi mute. o(^v^)o |
|
| |
|
toki 2 li lon
o sitelen e toki |
| |
| nanpa suli |
|
|
tenpo suno 5
lon tenpo nun 2
lon tenpo sike 07
(Mon) 17:38 |
| |
tenpo ni la jan pi kulupu lon lipu Jaku li toki e ni: toki pona li kama toki e nanpa suli kepeken nasin seme? ni li ijo suli. mi ken ala lukin pona e toki Inli. taso mi lukin kulupu lon lipu Jaku kepeken ilo toki li sitelen lili.
nanpa suli li weka la mi ken ala sitelen tenpo sike lon nasin pi kulupu Elopa. tan jan Kolisu li jan pi tenpo pini mute mute mute! taso mi pilin e ni: mi mute ken pona e ijo kepeken nasin ante. tenpo ni la mi ken sitelen tenpo sike lon nasin pi kulupu Nijon. tenpo sike ni li tenpo pi luka luka luka tu tu lon tenpo pi jan lawa Akiwito. mi pilin e ni: nasin sama li ken lon toki pona. tenpo sike 2001 lon nasin pi kulupu Elopa la toki pona kama lon. ni li ken ala ken tenpo open pi tenpo sike lon nasin pi kulupu toki pona? ni li ken la tenpo sike ni li tenpo pi luka tu lon tenpo pi kulupu toki pona.
mi pilin e ni: nasin toki pi tenpo sike li ijo lili. nasin toki pi nanpa mani li ijo suli. jan mute pi kulupu lon lipu Jaku li lon ma Elopa en ma Amelika (lete en seli). taso jan mute ni li toki pilin ike. o lukin e nanpa pi ante tan mani Mewika tawa mani Nijon. tenpo mute la mi tawa tomo pi telo seli wawa li pana mani Nijon 300 tawa 600. mi tawa tomo moku li pana mani Nijon 1000 tawa 1500. ni li ijo lon ma tomo Tokijo. toki pona li kama jo e nimi nanpa suli la mi ken toki e ni lon toki pona. |
|
| |
|
o sitelen e toki |
| |
| sina sona ala sona e moku Natto? |
|
|
tenpo suno 22
lon tenpo nun 1
lon tenpo sike 07
(Mon) 14:01 |
| |
mood: relaxed
|
mi ken ala toki e moku Natto pona lon toki pona. mi pilin e ni: ni li ko sike pi kili kiwen lili jelo. sina sona ala la o lukin e sitelen ni. moku Natto li lon lipu Wikipesija lon toki Nijon, toki Anku, toki Sonko, toki Tosi, toki Inli, toki Kanse, toki Epanja, toki Italija, en toki Wensa.
tenpo wan pini la tomo pi pana sitelen tawa lon ma tomo Osaka li pana sona e ni: moku Natto lon tenpo suno sin en tenpo pimeja li lili e sijelo jan. tenpo kama tan ni la moku Natto ali lon ma Nijon li weka tan tomo pi ijo kama jo. mi pilin ike mute. moku Natto li pona mute tawa mi. taso mi ken ala kama jo e moku Natto.
tenpo pimeja pini la tomo pi pana sitelen tawa ni li pana toki e ni: sona pi moku Natto ni li pakala.
http://mdn.mainichi-msn.co.jp/national/news/20070122p2a00m0na005000c.html
ona li toki e ni: sitelen pi "sijelo pi jan Mewika tan suli tawa lili" li jan tu ante. (lukin pi jan Mewika ali li sama tawa jan Nijon. mi pilin e ni: lukin pi jan Nijon ali li sama kin tawa jan Mewika. ala?) toki pi jan sona lon toki Inli en lon toki Nijon li sama ala. ...
ni li ijo suli tawa jan mute lon ma Nijon. taso mi pilin pona lili e ni: tenpo kama la mi ken kama jo e moku Natto! ni li ijo suli mute tawa mi. |
|
| |
|
o sitelen e toki |
| |
| mi open lipu ni! |
|
|
tenpo suno 17
lon tenpo nun 12
lon tenpo sike 06
(Sun) 17:12 |
| |
mood: happy
|
pona!
mi kama sona e toki pona li kama tawa lipu ni tan kulupu pi toki pona lon lipu LiveJournal.
mi wile kama jo sona pi toki pona sin mute li wile sitelen e ijo poka mi lon lipu ni kepeken toki pona. |
|
| |
|
toki 1 li lon
o sitelen e toki |
| |
|
|
|
![[info]](http://l-stat.livejournal.com/img/userinfo.gif){kind=small}
yohs's journal
